Lajmi i fundit: Rilindja arreston Kokëpalarët

Të ndaluarit janë Arlind Qori, Jani Marka, Redi Muçi dhe Pavjo Gjini. Ata janë dërguar në Komisariatin nr. 1 prapa Ministrisë së Punëve të Jashtme ku disa aktivistë të tjerë po protestojnë duke kërkuar lirimin e tyre.

“Sot, më 21 janar 2014, rreth orës 10:20, janë arrestuar katër aktivistët e Organizatës Politike gjatë aksionit simbolik në përvjetorin e ngjarjes së 21 Janarit. Dhjetëra pjesëtarëve të Policisë, nuk i janë dashur as dhjetë minuta për të ndërhyrë në aksionin e Organizatës Politike dhe t’I arrestojnë aktivistët,të cilët të qetë po mbanin një pankartë me mbishkrimin “Kokëpalarë të të gjitha rrethinave, bashkohuni!”, para Piramidës” bëhet e ditur në një njoftim të kësaj organizate.

Organizata Politike pati njoftuar se do të protestonte sot për faktin se katër të vrarët e 21 janarit janë ende pa drejtësi, se njeriu që ndezi fitilin e protestave me videon korruptive Ilir Meta është ende i lirë dhe se Edi Rama, sipas kësaj organizate, ka tradhtuar kauzën duke nënshkruar marrëveshje qeverisëse me Ilir Metën.

Mësohet se kokëlarët vijuan ceremoninë e tyre përkujtimore në shkallët e kryeministrisë.

Aktivistët e ndaluar nga policia u liruan disa orë më vonë. Atyre iu tha se çështja e tyre i është referuar prokurorisë, një procedurë standard e Policisë së Shtetit.