12 pyetje për Opozitën!
Billi Piligrim
Do doja të dilja në protestë nesër (sinqerisht), por më duhet një përgjigje për pak pyetje “naive”: Ish kryeministri thotë se në qeveri janë trafikantët e drogës dhe po ashtu ka thënë që pas 23 qershorit se trafikantët e drogës i vodhën/blenë zgjedhjet, praktikisht blenë pushtetin dhe tani po e shfrytëzojnë për të bërë trafik. Që unë të dal në protestë duhet t’i marr këto si të vërteta të mirëqena, por nëse mendoj kështu më del një problem. Ish-kryeministri drejtoi Shqipërinë për 8 vite dhe e mori pushtetin siç ka thënë vetë me vota të ndershme përballë krimit të organizuar të cilin më pas e luftoi. Tani ajo që më shqetëson mua është se si ka mundësi që pas 8 vitesh lufte kundër trafikantëve këta ishin aq të fuqishëm saqë jo vetëm e sfiduan Berishën, por ja morën pushtetin?! Pra pas 8 vjetësh nga 2005 (kur krimi se mundi dot Berishën opozitarë me çelësa kashte në dorë) në 2013 kur krimi mund Berishën pushtetar me të gjitha në dorë a nuk do të thotë kjo se qe të paktën i paaftë ta luftojë krimin?!
Nëse unë i marr të mirëqena akuzat dhe dal nesër në protestë, çfarë garancish kam që opozita e cila ende nuk ka treguar se pse dështoi të mundte krimin dhe e la të forcohej deri ne atë pikë sa t’i rrëmbente pushtetin dhe për rrjedhojë as se si do ta përmirësonte këtë duke u rikthyer në pushtet, nuk do të jetë po kaq e paaftë dhe ta lërë krimin të livadhisë si t’i dojë qejfi. Unë si qytetarë i bie të mbeten nën sundimin e trafikantëve apo jo pavarësisht se cili do të ishte kryeministri.
Me sinqeritet dhe pa ironi fare nëse unë dal nesër në protestë cila është garancia se pas 4 apo 8 vitesh të tjera në pushtet të PD-së krimi nuk do jetë edhe më i fortë se sa doli pas 8 viteve të para të pushtetit të kësaj force dhe kush e di ç ‘bëmash do na bëjë… Meqë i rash gjatë, tani po ua shkruaj shkurt dhe qartë pyetjet që janë 12 siç e ka dhe titulli.
Por më parë lërmëni të pohoj se një protestë kundër gjendjes së sotme të vendit duhet të ndodhë, më duhet gjithsesi të pohoj që opozita bën detyrën e saj si opozitë duke demaskuar këto ngjarje që kanë ndodhur. Atëherë pasi u sqaruam fillojmë nga pyetjet e qytetarëve për opozitën:
- Nëse është e vërtetë që qeveria Berisha luftoi krimin e organizuar atëherë si ka mundësi që bandat ia morën atij pushtetin?
- Berisha dhe Basha akuzojnë për baron dhe oligarkë dyshen Rama-Meta, por a nuk ishte z. Meta aleati i vyer i Berishës për 4 vite?
- A ka pasur në krah Berisha një aleat që ka qenë mafioz dhe baron droge? Nëse po përse nuk e arrestoi atë por pranoi të bashkëqeveriste?
- Si shpjegohet që për 8 vite në pushtet mazhoranca e djeshme nuk dërgoi një dosje në prokurori me emrin e një zyrtari të lartë (qoftë edhe deputet i opozitës) si të lidhur dhe të inkriminuar me mafian e drogës?
- Çfarë qëndrimi mban opozita e sotme për akuzat ndaj një numër zyrtarësh të lartë në drejtimin e policisë (kini parasysh kabllogramet e ambasadës Amerikane) qenë të akuzuar për korrupsion; e ku paprekshmëria e tyre vinte për shkak të fijeve të ngushta që ato kishin me ish kryeministrin?
- Si shpjegohet që disa nga këto individë ende sot janë në sferat e opozitës në pozicione të ndryshme?
- Duke pranuar argumentin se mazhoranca u mund dje nga bandat dhe baronët e drogës. Çfarë garancish jep ajo, pasi dështoi në mundjen e krimit sa që ai i rrëmbeu pushtetin, se nuk do të jetë po kaq e paaftë dhe ta lërë krimin të livadhisë si t’i dojë qejfi nëse vjen në pushtet?
- Çfarë garancish më ofron opozita kur eksponentë të ndryshëm të saj janë lidhur ngushtë me emra të fortësh në qytetet e ndryshme të vendit dhe sot gjenden në parlament?
- Çfarë garancish më ofron opozita e sotme që kur të vijë në pushtet do të ligjërojë ligjin Anti-Mafia duke dënuar mafiozët kudo qofshin ato?
- Nëse krimi u bë më i fortë nën qeverisjen e PD aq sa i mori pushtetin, si mund t’i besoj PD që do të rrëzojë krimin nga pushteti?
- Nëse gjatë qeverisjes së PD shqiptarët u varfëruan aq shumë saqë përkundër asaj që ndodhi në 2005 u shitën te krimi i organizuar, çfarë do të ndodhte pas 4 vitesh të tjera qeverisje të ngjashme?
- A ka ndonjë plan PD se si mund ta korrigjojë këtë dështim të vetin?