Ministër Shteti
Një nga pesë anëtarët e qeverisë “Meta” 2 që u betuan nën titullin “Ministër Shteti” më 12 shtator 2001, në qeverinë me numrin më të madh të ministrave në historinë e Shqipërisë. Nënkupton një njeri relativisht kot që duhet bërë diçka që të ndjehet në pozicion pushteti, edhe pse nuk ka kurrfarë pushteti.
Pas zgjedhjeve të manipuluara të vitit 2001, Meta e ndjeu veten nën presion brenda partisë nga kryetari Fatos Nano dhe për rrjedhojë, u përpoq që të rekrutonte sa më shumë prej figurave të ndritura të partisë, në rradhët e qeverisë së tij si kundërbalancë ndaj Nanos.
Për rrjedhojë, qeveria u bë me 22 anëtarë, ku ministritë u ndanë në disa copa për të krijuar më shumë ministra dhe kur kjo nuk mjaftoi, u krijuan edhe pesë Ministra pa Portofol, me titullin bombastik Ministër Shteti. Vetë Ministrat e Shtetit qenë të ndarë në dy kategori: ata më të ngriturit, qenë ministër shteti për diçka, si psh. ‘ministër shteti për integrimin’ ndërsa të tjerët, qenë thjeshtë “Ministër Shteti”.
Krijimi i një qeverie të tillë ngriti probleme të shumëfishta për shtetin shqiptar. E para, doli problemi që, rritja e numrit të ministrave nga 18 në 22, nuk qe e shoqëruar me alokimin e fondeve të nevojshme në buxhet për rrogat e ministrave shtesë, rojet e tyre, makinat e sekretaret. E dyta, qeveria shqiptare nuk dispononte mjedise të përshtatshme për t’i shpallur si ngrehina ministrish. Rrjedhimisht, një sallë në Pallatin e Kongreseve u shpall me ngut zyrë e hapur për disa ministri njëkohësisht, ku ministrat mund të përshëndesnin njëri-tjetrin pa lëvizur nga tavolina e tyre ministrore.
Nga figurat e ndritura të njohura si “Ministra Shteti”, disa bënë karrierë të suksesshme ndërsa disa të tjerë, nuk dihet të kenë ekzistuar më që nga ajo kohë.
Qeveria Meta 2 u zëvendësua nga qeveria Majko 2, në shkurt 2002, e cila jetoi gjithashtu tre muaj. Fjalorthi Politik Shqiptar
Qeveria Meta 2, shtator 2001 – 29 janar 2002.
- Ilir Meta Kryeministër
- Skënder Gjinushi Zëvendëskryeministër dhe Ministër i Punës dhe Çështjeve Sociale
- Arta Dade Ministre e Punëve të Jashtme
- Ilir Gjoni Ministër i Rendit Publik
- Pandeli Majko Ministër i Mbrojtjes
- Anastas Angjeli Ministër i Financave
- Sokol Nako Ministër i Drejtësisë
- Arben Imami Ministër i Pushtetit Vendor dhe Decentralizimit
- Mustafa Muçi Ministër i Ekonomisë Publike dhe Privatizimit
- Bashkim Fino Ministër i Punëve Publike dhe Turizimit
- Maqo Lakrori Ministër i Transportit
- Ben Blushi Ministër i Arsimit dhe Shkencës
- Gjergj Koja Ministër i Shëndetësisë
- Ermelinda Meksi Ministre e Bashkëpunimit Ekonomik dhe Tregtisë
- Agron Duka Ministër i Bujqësisë dhe Ushqimit
- Luan Rama Ministër i Kulturës, Rinisë dhe Sporteve
- Et’hem Ruka Ministër i Mjedisit
- Paskal Milo Ministër Shteti për Integrimin Europian
- Dritan Prifti Ministër Shteti për Energjetikën
- Ndre Legisi Ministër Shteti
- Lufter Xhuveli Ministër Shteti
- Niko Kacalidha Ministër Shteti
Burimi: Vendimi i Kuvendit Nr.2, datë 12.9.2001 “PËR MIRATIMIN E PËRBËRJES DHE PROGRAMIT POLITIK TË KËSHILLIT TË MINISTRAVE”
